ఒత్తిడి, ఆందోళ‌న‌కు ఈ శ్వాస వ్యాయామాలతో చెక్ పెట్టండి.

Stress - Anxiety Management: ఆందోళనను ఎదుర్కోవటానికి, ఒత్తిడిని అధిగ‌మించ‌డానికి మందులు వాడ‌టం కంటే శ్వాస వ్యాయామాలు ప్ర‌య‌త్నించ‌డం మంచిది.

ఒక వ్య‌క్తిలో భయం, అసౌకర్యం వంటివి ఎక్కువైన‌ప్పుడు ఒత్తిడి, ఆందోళనకు గుర‌వుతారు. వీటిని పెద్ద రుగ్మ‌తలా భావించాల్సిన అవ‌స‌రం లేదు. ఒత్తిడి, ఆందోళన అనేవి సాధారణ భావోద్వేగాలే. కానీ ఆత్రుత, ఆందోళన వంటివి దీర్ఘ‌కాలంలో మాన‌సిక స‌మ‌స్య‌ల‌కు దారితీసే ప్ర‌మాదం ఉంది. ఇవి ప‌దే ప‌దే వేధిస్తుంటే.. న‌లుగురిలో క‌ల‌వ‌క‌పోవ‌డం, మిత్రులు, బంధువుల‌కు దూర‌మ‌వ్వ‌డం, స‌మాజంలో ఒంట‌రిగా మిగిలిపోవ‌డం వంటివి జ‌రిగే ఆస్కారం ఉంది.

గుర్తించ‌డం ఎలా?

రక్తపోటు పెరిగిపోవ‌డం, వికారంగా అనిపించ‌డం, ప్ర‌తి విష‌యానికీ ఎక్కువ‌గా బాధ‌ప‌డ‌టం, ప్ర‌శాంత‌త లేక‌పోవ‌డం, చిరాకుగా అనిపించ‌డం, ఏకాగ్ర‌త కోల్పోవ‌డం, నిద్ర‌లేమి, తీవ్ర భ‌యాందోళ‌న‌లు వంటివి ఎదుర‌వుతుంటే ఆందోళ‌న బారిన ప‌డిన‌ట్టు భావించాలి. కొన్ని ర‌కాల శ్వాస వ్యాయామాల ద్వారా ఒత్తిడి, ఆందోళ‌న‌ను ఎదుర్కోవ‌చ్చు.

1. సాధారణ శ్వాస వ్యాయామం

ముక్కు ద్వారా నెమ్మదిగా, పూర్తిగా గాలి పీల్చుకోవాలి. భుజాలను విశ్రాంత స్థితికి తీసుకురావాలి. అనంత‌రం పొత్తికడుపును విస్తరిస్తూ ఛాతీని పెంచాలి. త‌ర్వాత‌ నోటి ద్వారా నెమ్మదిగా గాలిని బ‌య‌ట‌కు వ‌ద‌లాలి. దవడను విశ్రాంతంగా వ‌దిలేసి, గాలిని పూర్తిగా వ‌ద‌లాలి. దీన్ని కొన్నినిమిషాల పాటు ప్ర‌య‌త్నిస్తే మ‌న‌సు ప్ర‌శాంత‌త‌ను సంత‌రించుకుంటుంది.

2. సింహ శ్వాస వ్యాయామం (ల‌య‌న్ బ్రీతింగ్ ఎక్స‌ర్‌సైజ్)‌

ముందు వ‌జ్రాస‌నంలో కూర్చోవాలి. ముక్కు ద్వారా పూర్తిగా శ్వాస తీసుకోవాలి. త‌రువాత నోటి నుంచి హ అనే శ‌బ్దం చేస్తూ శ్వాస వ‌ద‌లాలి. నోటిని పూర్తిగా తెరి‌చి, నాలుకను గ‌డ్డం వైపు కింద‌కి పెట్టి గాలి వ‌ద‌లాలి. ఆ స‌మ‌యంలో నుదుటి మ‌ధ్య‌లో దృష్టి కేంద్రీక‌రించాలి. మ‌ళ్లీ గాలి పీల్చుకునేట‌ప్ప‌డు ముఖాన్ని సాధార‌ణ స్థితికి తీసుకురావాలి.3. ప్రాణాయామం(యోగ శ్వాస‌)

యోగా ఒక పురాతన అభ్యాసం. యోగాస‌నాలలో శ్వాస ప్రధాన భాగం. ప్రాణ‌యామంలో చాలార‌కాలు ఉన్నాయి. అవ‌న్నీఆందోళనకు దూరంగా ఉండేందుకు సాయంచేస్తాయి. భ్రమరి ప్రాణాయామం ఇందులో ముఖ్య‌మైన‌ది. ఇందులో శ్వాస తీసుకున్న త‌రువాత క‌ళ్లు, చెవులు మూసి తేనెటీగలా శ‌బ్దం చేస్తూ శ్వాస వ‌ద‌లాలి.

4. నాడిశోధ‌న‌ ప్రాణాయామం

ముందుగా పిడికిలి బిగించి ముక్కు కుడి వైపు రంద్రాన్ని బొటనవేలుతో మూసి ఉంచాలి. ఎ‌డ‌మ‌పైపు రంద్రంతో శ్వాస తీసుకోవాలి. త‌రువాత ఎడ‌మ రంద్రాన్ని చూపుడు వేలితో మూసి కుడి రంద్రం నుంచి శ్వాస వ‌ద‌లాలి. దీన్ని క‌నీసం అయిదుసార్లు ప్ర‌య‌త్నించాలి. ఈ శ్వాస వ్యాయామాలు ఆందోళనను దూరం చేసి ప్రశాంతంగా ఉండటానికి సహాయపడ‌తాయి.